"Акчаны даярдагыла". Мушкер Флойд Мейвезер Хабиб Нурмагомедовго жооп кайтарды

UFC'нин чемпиону Хабиб Нурмагомедов америкалык уюштуруучу Дежуане Блэйктин социалдык тармактагы баракчасы аркылуу Флойд Мейвезерди беттешке чакырган эле. Нурмагомедов "Жунгли токойлорунда бир эле хан бар, албетте, ал мен", - деп айткан.

Америкалык мушкер Флойд Мейвезер социалдык тармактагы баракчасы аркылуу Хабиб Нурмагомедовго жооп кайтарды.

Флойд Мейвезер "CBS, Showtime (америкалык теле жана радио каналдар) жана MGM Grand (мейманкана жана маанайшат тармактары) акчаны даярдагыла. Хабиб мени беттешке чакырды. Келгиле кайрадан Лас-Вегасты улуу кылабыз", - деп жооп кайтарды.

Айта кетсек, аталган эки мушкер тең профессионалдык карьерасында бир дагы жолу жеңилүү ызасын тартып көргөн эмес.

UFC'нин жеңил салмактагы учурдагы чемпиону Хабиб Нурмагомедов 27 беттеште жеңишке жеткен.

Флойд Мейвезер – бокс боюнча беш салмак категориясындагы дүйнөнүн экс-чемпиону. Ал карьерасында 50 беттеш өткөрүп бир дагы жеңилүү ызасын тарткан эмес.