Депутат Кыргыз өлкөсүндө жүргөн чет өлкөлүк жарандарды каттоого алган бирдиктүү база жок экенин айтты

Депутат Зарылбек Рысалиев Кыргыз мамлекетинде жүргөн чет өлкөлүк жарандарды каттоого алган бирдиктүү база жок экенин айтты. Бул тууралуу ал бүгүн, 16-октябрда парламенттин укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин жыйынында билдирди.

"Биздин өлкөдө жүргөн чет өлкөлүк жарандарды каттоого ала турган бирдиктүү база барбы? Бирдиктүү база жок болсо силер сунуштап жаткан мыйзамдагы өзгөртүү кантип иштейт? Эгерде эртең өлкөдөгү мигранттар тарабынан терракт болуп кетсе маалыматты кимден сурайбыз? Бүгүнкү күнү чет өлкөлүк канча адам каттоодо турат?” - деди Рысалиев.

Кыргыз өлкөсүндө жүргөн чет өлкөлүк жарандардын ичинен канча адам бирдиктүү базада турганы боюнча ИИМдин, Мамлекеттик миграция кызматынын жана УКМКнын өкүлдөрү так жооп берген жок.

Депутат Наталья Никитенко Зарылбек Рысалиев койгон бул суроо орчундуу экенин, бирдиктүү базаны түзүүнү жана эртең мыйзам долбоорун палатага чыгарып жатканда даярданып келүүгө чакырды.

Тармактык комитет “Тышкы миграция жөнүндө” Кыргыз Республикасынын Мыйзамына өзгөртүү киргизүү тууралуу” мыйзам долбоорун карап жатат.