Бишкекте 17 жаштагы кызды өлтүрүүгө шектелип 19 жаштагы шаар тургуну кармалды

Бишкек шаарында 17 жаштагы кызды өлтүрүүгө шектелип шаар тургуну кармалды. Бул тууралуу бүгүн, 16-октябрда Бишкек ШИИББинин басма сөз кызматынан билдиришти.

Маалыматка ылайык, 15-октябрь күнү саат 7:30 чамасында милицияга борбордогу жаңы конуштардын бириндеги үйдөн кыздын жансыз денеси табылгандыгы тууралуу маалымат түшкөн. Аталган дарекке барган милиция кызматкерлери каза болгон адам 2001-жылы туулган Э.Б. аттуу кыз экенин аныкташкан. Медициналык кароодон анын денесинен көк ала тактар табылып, ал киши колдуу болгону белгилүү болгон.

Бул факт боюнча кылмыш иши козголуп, кылмышка шектүү катары 1999-жылы туулган Т.у.Д. аттуу шаар тургуну кармалган. Учурда соттук-медициналык экспертиза дайындалып, кылмышка шектүү убактылуу кармоочу жайга камакка алынды. Айрым маалыматтарга таянсак, кыздын өлүмүнө шектүү жаран анын аталаш тууганы экени айтылууда.