Ысык-Көл ОИИБи: "25 жаштагы жарандын диний көз караштан улам сабалганы боюнча маалымат жалган"

"Ысык-Көл облусунун Тамчы айылында 25 жаштагы жарандын диний көз караштан улам сабалганы боюнча маалымат жалган". Мындай маалыматты 17-октябрда SUPER.KG'ге Ысык-Көл ОИИБинин маалымат кызматынан кабарлашты. Облустук милициянын басма сөз катчысы Сталбек Усубакуновдун айтымында, аталган айылдын үч тургуну ал музыканы катуу угуп жатканы үчүн мас абалда келип сабашкан.

Маалым болгондой, 16-октябрда Ысык-Көл РИИБине Кароол-Дөбө айылынын 25 жаштагы Элдос аттуу тургуну арыз менен кайрылган. Арызда таякесинин Тамчы айылындагы үйүн убактылуу карап, жашап жатканда 16-октябрга караган түнү үч жаран аны сыртка чакырып алып сабап салганын көрсөткөн. Өзүнүн айтымында, түнкү саат 2лер чамасында телефонун колонкага улап алып музыка угуп жаткан учурда Заманбек, Алеш жана белгисиз бир адам мас абалында келип сыртка чакырышкан. Сыртка чыккандан кийин музыканын үнүн катуу коюп алып угуп жатканы үчүн сабашкан.

Бирок жакындары айрым ЖМКларга алар Элдосту "эмнеге сен өз Кудайың тууралуу музыка угуп жатасың, ислам динин кабыл алып, келме келтир" деп сабап койгонун айтышууда.

"Жабырлануучунун алган жаракаты боюнча тийиштүү экспертизалар дайындалып, факты Ысык-Көл РИИБине катталган. Ал эми издөө иштеринин жүрүшүндө аны сабагандар 26 жаштагы Заманбек жана Ислам аттуу тургундар болуп чыкты. Экөө тең өз күнөөлөрүн моюнуна алып, үчүнчү адам изделүүдө. Учурда тергөө иштери жүргүзүлүп жатат жана соттук-медициналык экспертизанын жыйынтыгы менен юридикалык баа берилет", - деп билдирди Усубакунов.