Шаардык сот Сапар Исаковдун бөгөт чарасын өзгөртүүсүз калтырды

Бишкек шаардык соту мурдагы премьер-министр Сапар Исаковдун бөгөт чарасын өзгөртүүсүз калтырды. Бул маалыматты SUPER.KG порталына КСДПнын өкүлү Кундуз Жолдубаева тастыктады.

Буга чейин Сапар Исаковдун жактоочулары Биринчи Май райондук сотунун 5-декабрга чейин камакта калтыруу чечимин жокко чыгарууну өтүнүп, Бишкек шаардык сотуна кайрылышкан.

Бүгүн соттук отурумдун жүрүшүндө Исаковду жубайы менен көрүштүрүүгө уруксат берилген жок.

Ал эми соттун жүрүшүндө Исаков кайрылуу жасап буларга токтолду.

"Мен өз өлкөмдөн эч жакка качпайм. Мындай пикиримди камакка алынардан мурда деле айтып келгем. Мага май айында өлкөдөн чыкпоо чечими чыкты, андан соң бат эле камакка алындым. Мен ошондо эле бул жерде саясий оюндар башталганын сезгем", - деди ал.

Окуянын чоо-жайы:

29-майда Сапар Исаковго карата Бишкек ЖЭБине байланыштуу козголгон "коррупция" беренеси боюнча айып тагылган. 5-июнда эки айга камакка алынган. 31-июлда анын абактагы тергөө мөөнөтү дагы эки айга узартылган.

1-октябрда Бишкектин Биринчи Май райондук соту мурдагы премьер-министр Сапар Исаковдун тергөө абагында калуу мөөнөтүн 5-декабрга чейин узарткан.

Сапар Исаков бул окуя боюнча суракка келип жүргөн учурунда журналисттерге "саясий куугунтук болуп жатат" деп айткан.