Бурулайдын өлүмү боюнча соттук отурум: Марс Бөдөшовдун бир тууган агасы Жолдошбек Бөдөшов сотто күбө катары сурак берди

Бүгүн, 18-октябрда Бишкек шаарынын Свердлов райондук сотунда милиция бөлүмүндө бычакталып өлтүрүлгөн Бурулай Турдали кызынын окуясы боюнча кезектеги соттук отурум өтүүдө.

Соттук отурумда айыпталуучу Марс Бөдөшовдун бир тууган агасы Жолдошбек Бөдөшов күбө катары суралды.

"Үй-бүлөдө 6 бир тууганбыз. Маршруттук такси айдап үч бир тууган тең иштечүбүз. Бурулайдын атасы менен дагы мамилебиз жакшы болчу. 4-майда иним Марс телефон чалып, сүйлөшкөн кызын ала качып бара жатканын айтты. Биз туугандар болуп ачуу басарга барууга чогулдук. Ошол убакта апам Бурулай менен сүйлөшүп, анын кийиминин размерин жана кандай өңдөгү халат ала турганын сурады. Биз кыздын ата-энесине бардык, алар бизди кабыл алды, болгону кызымдын кандай көңүлү бар экендигин сурайм деди. Макул болуп Бурулайга телефон чалдык. Анын бир тууган эжеси телефонду алып башка бөлмөгө кетип калды. Бир кезде Турдали атаны (ред. Бурулайдын атасы) кошо чакырып кетип, кызды кайтаргыла, эки айдан кийин той өткөрүп, жол-жобосу менен алып кеткиле деди. Биз макул болуп, Марсты жолдон кайра артка кайтардык. Ошол түнү Бурулайды кайра алып келип бердик. Эртеси биз барсак, алар кызды зордоп, өз оюна каршы алып кеткен турбайсыңарбы деди".

Жолдошбек Бөдөшовдин айтымында, 27-майда Бурулайды иниси Марс ала качып кеткенин саат 22:00дө уккан.

"Жабырлануучу тараптын доого коюлган 2 миллион сомун төлөп берүү оюңарда барбы" деген суроого Марстын агасы Жолдошбек Бөдөшов "ойлонуп көрүшүбүз керек, убакыт керек" деп жооп берди.

Кийинки соттук отурум, 24-25-30-31-октябрь күндөрүнө дайындалды. Бардык күндөрдө тең соттук отурумдар саат 15:00 дө болот.