Боорун алмаштырган Милан Садыкжан уулунун абалы жакшы, ал 20 күндүн ичинде мекенине кайтып келет

Боорун алмаштырган Милан Садыкжан уулунун абалы жакшы, ал 20 күндүн ичинде мекенине кайтып келет. Бул тууралуу SUPER.KG порталына Садыкжан уулунун эжеси Акзуура Бекерова билдирди.

Маалыматка ылайык, Садыкжан уулу кечээ,18-октябрда жандандыруу бөлүмүнөн палатага которулду.

"Милан өзүн жакшы сезип калгандыгына байланыштуу палатага которулду. Өз алдынча тамак ичип баштады. Ага донор болгон карындашынын да абалы жакшы. Операция 10 саатка созулду. Бир сутка дегенде өзүнө келип, жандандыруу бөлүмүндө 6 күн жатты. Буюрса, ооруканадан 10 күндүн ичинде чыгат дешти. Абалы дагы жакшырганга чейин 10 күндөй Индияда болушат. Андан соң Кыргыз өлкөсүнө кайтып келишет. Миландын маанайы жакшы, эң негизгиси операция ийгиликтүү өттү", - дейт Бекерова.

Буга чейин Милан Садыкжан уулу SUPER.KG порталына жардамга муктаж болуп жатканын айтып кайрылган. Кайрымдуу мекендештердин жардамы менен керектүү суммадагы акча чогулуп Индияга операция жасатуу үчүн учуп кеткен. Ал эми 12-октябрда ага операция жасалган.