Ошто көп кабаттуу жатаканадан ымыркайы менен боюн таштаган келин камакка алынды. Ага "адам өлтүрүүгө аракет кылган" деген айып тагылууда

Ошто көп кабаттуу жатаканадан ымыркайы менен боюн таштаган келин камакка алынды. Бул тууралуу бүгүн, 19-октябрда SUPER.KG'ге Ош ШИИБинин басма сөз катчысы Замир Сыдыков билдирди.

Белгилүү болгондой, окуядан кийин колундагы 7 айлык баласы менен төртүнчү кабаттан секирген келинге 28-97-берене (адам өлтүрүүгө аракет кылган) менен кылмыш иши козголгон. Ага козголгон кылмыш ишинин негизинде ал ооруканадан чыккандан кийин камакка алынган.

"Кылмышка шектүү 10-октябрь күнү соттун чечими менен 2 айга камакка алынды. Учурда ал Жалал-Абаддагы аялдардын №53-СИЗОсунда камакта отурат. Бул окуя боюнча тергөө амалдары улантылууда", - дейт Сыдыков.

Саламаттыкты сактоо министрлигинин басма сөз кызматы буга чейин ымыркайдын абалы оор экенин билдирген болчу. Ал башынан оор жаракат алып, анын башына операция жасалган.

Эске салсак, 6-сентябрда 40 жаштагы келин Черёмушки кичи районунда жайгашкан төрт кабаттуу жатаканадан колундагы баласы менен кошо боюн таштаган. Алдын ала алынган маалыматтар боюнча, ал Кара-Балта шаарынан күйөөсү менен таарынышып төркүнүнө барган. Айрым күбөлөрдүн айтымында, күйөөсү менен пикир келишпестиктен улам келин спирт ичимдиктерин көп ичип жүргөндүгүн, окуя болгон күнү да алкоголдук ичимдиктерди ичкени белгилүү болгон.