Австралияда "рак илдетине кабылдым" деп алдап, 55 миң доллар чогулткан кыз сот жообуна тартылат

Австралияда рак илдетине кабылдым деп 55 миң доллар чогулткан кыз сот жообуна тартылат. Бул тууралуу чет элдик басма сөз каражаттары жазып чыгышты.

Маалыматтарга ылайык, Австралиянын Квинсленд штатынын тургуну 27 жаштагы Люси Виланд өзүнүн социалдык тармактагы баракчасына рак илдетине кабылганын жана бир жылга жакын гана өмүрү калганын жазган. Муну менен кошо ал чачын кырып, оорулуу адамга окшоп түшкөн сүрөтүн жүктөгөн. Люсинин бул сүрөтүнө көпчүлүк колдонуучулар ишенип, ага кайрымдуулук катары каражаттарды жиберип башташкан. Жыйынтыгында чогулган акчанын саны 55 миң АКШ долларын түзгөн.

Колдонуучулардын бири Люсинин оорулуу экендигинен шек санап, чын-бышыгын билиш үчүн полицияга арыз менен кайрылган. Полициянын иликтөө иштеринин негизинде анын эч кандай оорулуу эмес экени аныкталган.

Мунун негизинде полиция Люси Виландга карата "алдамчылык" беренеси боюнча кылмыш ишин козгогон. Соттун чечими 14-декабрда чыгары күтүлүүдө.