Кыргыз өлкөсүнүн Киров суу сактагычынын 90 пайызын Казакстан колдонот

"Эмне үчүн суу сактагычтарыбыздан пайда таппайбыз" деп сурады депутат Кенжебек Бокоев парламенттик комитеттин жыйынында.

Эл өкүлү Киров суу сактагычына жылына канча каражат жумшаларына кызыкты.

"Киров суу сактагычынын суусунун 90 пайызы Казакстанга кетсе, эмне үчүн биз ага көп каражат жумшашыбыз керек? Кировду сактап туруш үчүн канча каражат кетет? Эмне үчүн биз суу сактагычтардан пайда таба албайбыз? Стратегиялык объектибизге алар цементине чейин өздөрү алып келип, ремонттоп чыгып кетип жатышат", - деди Бокоев.

Айыл чарба, тамак-аш өнөр жайы жана мелиорация министри Нурбек Мурашев жылына Кировго 4,5 миллион сом каражат кетерин айтып, анын 1,5 миллион сомун гана Кыргыз өлкөсү сарптай турганын айтты.

"Киров суу сактагычынын капиталдык ремонтун Казакстан моюнуна алган. Быйылкы жумуштун 70 пайызы бүтүп калды. Коңшу өлкөнүн Айыл чарба министрлиги менен сүйлөштүк. 2019-жылы ремонтту биз жүргүзө турган болдук", - деди Мурашев.

Учурда комитетте 2019-жылдын бюджети каралып жатат.