Чиновник депутаттарга Бишкек-Ош жолу эмнеден улам бузулуп жатканын түшүндүрдү

Бүгүн, 22-октябрда Жогорку Кеңештин тармактык комитетинин жыйынында депутат Руслан Казакбаев Ош-Бишкек унаа жолунун бузулуп жатканынын негизги себебин транспорт жана жолдор министринин орун басарынан сурады.

Чиновник депутаттын суроосуна жооп бере албагандыгынан, анын ордуна министрликтин башка жооптуу кызматкери жооп берди.

"Бишкек-Ош жолун оңдоп-түзөө долбоору 1996-жылы ишке ашырылып башталган. Ал убакта жолдон өткөн унаалардын жалпы саны аз болчу. Жол саатына 6 жарым миң унаадан 11 миң унаага чейин өткөнгө ылайыкталган. Жүктүн көлөмү 8 тоннага чейин гана ылайыкталган. Мурда КамАЗ үлгүсүндөгү унаалар, учурда Хово үлгүсүндөгү оор жүк ташуучу унаалар өтүп жатат. Өзгөчө күйүүчү май ташыган унаалар жайкысын оор жүк менен баратып, ысып турган асфальттын үстүнөн тормоз басканда, асфальт сүрүлүп, жол бузулуп жатат. Ушундан улам жаңы Түндүк-Түштүк альтернатива жолун куруу зарылчылыгы келип чыкты", - деди министрликтин кызматкери.