Австралиянын өкмөт башчысы сексуалдык зомбулуктун курмандыгы болгондордон кечирим сурады

Австралиянын премьер-министри Скотт Моррисон сексуалдык зомбулукка кабылгандардын алдында расмий түрдө кечирим сурады. Бул тууралуу чет элдик маалымат булактары жазууда.

Маалыматта жазылгандай, Канберра шаарына өкмөт башчынын парламентке карата жасаган эмоциялуу кайрылуусун угуу үчүн жүздөгөн адамдар келген. Мындай кайрылуу беш жылга созулган иликтөөлөрдүн жүрүшүндө 10 жылдай убакыт аралыгында өлкөдөгү уюмдарда жана мекемелерде он миңдеген бала сексуалдык зомбулукка кабылгандыгы аныкталгандан кийин жасалган.

"Бүгүн биз балдарыбыздын буга чейин угулбай жаткан добуштарын уга алабыз жана алардын көйгөйүн моюнга алабыз. Биз сексуалдык зомбулукка кабылган балдардын алдында башыбызды ийип, алардын кечиришин сурайбыз", - деген ал өзүнүн кайрылуусунда.

Маалыматка ылайык, 2017-жылдын декабрь айына чейин жүргүзүлгөн иликтөөнүн жүрүшүндө сексуалдык зомбулукка кабылган 8 миңден ашык адамдан көрсөтмө алынган. Алар ар кайсы мекемелерде мындай жагымсыз кырдаалга туш болгонун, анын ичинде чиркөө, мектеп, спорттук клубдар да бар экенин айтышкан.

"Эмнеге балдардын, алардын ата-энелеринин мындай кайрылууларын көз жаздымда калтыргансыңар? Эмнеге биздин соттор мыйзамсыз иштерге көз жумган? Эмнеге сексуалдык зомбулукка каршы иш-аракеттерди баштоого ушунча көп убакыт талап кылынды?" - деген Моррисон эмоциялуу сөзүндө.

Ал эми оппозиция лидери Билл Шортен парламентке кайрылып: "Оңдогонго мүмкүн болбогон зыяндуу нерселер бар. Бирок бүгүн Австралия ал нерселерди кечирип коюуну суранып жатат", - деген.

Премьер-министрдин жана оппозиция лидеринин сөзүнөн кийин парламентте эскерүү мүнөтү жарыяланган. Сексуалдык зомбулуктун курмандыгы болгондордун бири маалымат булактарына интервью берип жатып: "Мени премьер-министрдин кечирим сурагандыгы аябай колдогондой болду. Биз күткөн нерсебизди уга алдык", - деген.