Эмгек жана социалдык өнүктүрүү министринин орду бош турганына байланыштуу парламент жөлөк пул боюнча мыйзамды күн тартибинен алып салды

"Эмгек жана социалдык өнүктүрүү министринин орду бош турганына байланыштуу жөлөк пул мыйзамын күн тартибинен алып салууну сунуштайм" деп айтты парламенттин Социалдык маселелер, билим берүү, илим, маданият жана саламаттыкты сактоо боюнча комитетинин төрайымы Гүлкан Молдобекова жыйын учурунда.

Ал аталган сунуш менен төрага Дастанбек Жумабековго кайрылды.

Сунуш канааттандырылып, “Кыргыз Республикасындагы мамлекеттик жөлөк пулдар жөнүндө” мыйзамына өзгөртүүлөрдү киргизүү маселеси күн тартибинен алынды.

Аталган министрликтин мурдагы жетекчиси Таалайгүл Исакунова жана анын 3 орун басары тең буга чейин кызматтан кеткен. Министр Таалайгүл Исакунова менен орун басары Лунара Мамытова чет өлкөгө жасаган сапарларынан улам кызматтан кетсе, дагы бир орун басары Зууракан Каденова Сеул шаарындагы учактагы окуясынан улам иштен алынган. Ал эми үчүнчү орун басары Жылдыз Полотова өз каалоосу менен кызматын тапшырган.

"Кыргызстан" фракциясы аталган кызматка 3 талапкерди сунуштады.