"Сиз калп айтпаңыз!" Төрага Дастанбек Жумабеков чиновникти сынга алды

“Үрөн департаменти иштебей эле бюджеттен акчасын коротуп жатат". Мындай пикирин Жогорку Кеңештин төрагасы Дастанбек Жумабеков парламент жыйынында билдирди.

Төрага айыл чарба, тамак-аш өнөр жайы жана мелиорация министринин орун басары Жаныбек Керималиевди "калп айтпаңыз" деп сынга алды.

Жумабеков Керималиевден "элге силердин департамент жаңы үрөндөрдү ойлоп таап, тараттыбы" деп сурады. "Биздин департамент сунуштаган үрөндөрдү дыйкандар албай жатат" деп жооп берди министрдин орун басары.

Төрага Үрөн департаменти өз ишин аткара албай жатканын эскертти. "Кайсы элге кайсы урукту сунуштап жатасыз? Эл алган жок үрөндү? Бул департаменттин иши начар болуп жатат. Эл өзү билип, сырттан көчөттөрдү алып келип өздөрү аракет кылып жатат. Сиз калп айтпаңыз. Биринчи далилдеп анан келиңиз. Департамент бюджетти максатсыз эле коротуп жатат", - деди Жумабеков.

Учурда парламентте үрөн жөнүндө мыйзам талкууланып жатат.