Баткен облусундагы "Шамбесай" кениндеги окуя. Министр мыйзамды сыйлоого чакырды

Кадамжай районунун Майдан айылындагы “Шамбесай” алтын кенинде кечээ, 23-октябрда жаңжал чыккан. Мекемелер аралык комиссиянын өкүлдөрү аталган кенде иликтөө иштерин жүргүзүү максатында суу менен топурак алуу үчүн келишкенде жергиликтүү эл каршылык көрсөткөн. Окуя болгон жерде тартылган видеодон милиция кызматкерлери аялдарды булкуп эки жакка түрткүлөп жатканын көрүүгө болот.

Бул окуя боюнча, ИИМ министри Кашкар Жунушалиев коллегиянын жүрүшүндө суроолорго жооп берип жатып, мыйзамды сыйлоого чакырды.

"Кыргыз жараны болгондон кийин өлкөнүн мыйзамын сыйлоо керек. Ишке кире элек ишкананын иштөөсүнө нааразычылыгын билдирип чыгуу мыйзам бузууга жатат. Бул ишкана боюнча тиешелүү экспертизалар дайындалган. Бирок жергиликтүү тургундар чыга элек жыйынтыкка да нааразы болууда", - деди Жунушалиев.

Ал эми облусттук милициядан милиция кызматкерлери аялдарды сүйрөп кетип жаткандагы көрүнүш боюнча "алар тартипти сактаган" деп билдиришти.