Чиновник "Өлкөдөгү эгин талааларын зыянкеч жандыктардан арылтууга 10 трактор жана 15 унаа жетиштүү" дейт

Эгин талааларындагы өсүмдүктөрдү чегиртке жана башка зыяндуу заттардан коргоо үчүн Химиялаштыруу жана өсүмдүктөрдү коргоо департаментинде 10 трактор, 15 Тойота Хайлюкс унаасы бар. Бул тууралуу бүгүн, 24-октябрда Жогорку Кеңештин жыйынында айыл чарба, тамак-аш өнөр жайы жана мелиорация министринин орун басары Жаныбек Керималиев депутат Талант Мамытовдун суроолоруна жооп берип жатып айтты.

Ал жогорудагы техникалар дыйкандардын кыйынчылыгын жоюу үчүн жетиштүү экенин белгиледи. “Быйыл чегиртке жылдагыдан көп чыкты, бирок 10 “Беларусь” трактору жана 15 Тойота Хайлюкс унаасынын күчү менен өлкө боюнча айдоо аянттарындагы чегирткелерди жок кылууга жетише алдык”, - деди чиновник.

Депутат Талант Мамытов санап өткөн техникалар менен айдоо аянтындагы көйгөйлөрдү жок кылуу мүмкүн эмес экенин айтып, бул боюнча комиссия түзүлүшү керек экенин белгиледи.