Гүлзат Мамытбек мындан ары ырчылык менен кызуу алектенет

Өзүн кыргыздын деми атаган Гүлзат Мамытбек "Кыргызым менин" аттуу төртүнчү чыгармасына клип тарттырып, анын бет ачарын өткөрдү. Клиптен ырчынын чыгармасы максатсыз жаштарга дем, күч бергенин көрүүгө болот. Клиптин бет ачарынан кийин Гүлзат айым SUPER.KG порталына маек курду.

"Кыргызым менин" аталышындагы ырым - төртүнчү чыгармам. Буга чейин "Кыз бурак", "Россия-матушка, вставай!" чыгармаларын аткарып чыккам. Азыркы ырчылардын ырларынан эч кандай дем ала албайсың, тескерисинче, мааниси жок же уятын ачкан сөздөрдү угууга болот. Андай чыгармалар менен эч кимди ойгото албайсың. Өзүңүздөр билгендей, буга чейин дем берип, шыктандырган сөздөрдү айтып, кыска видеолорду тартып келгем. Жакында эле Кариб аралына барып ал жактан эстетика боюнча сабак алдым. Ошондо буга чейин айтып, дем берип жүргөн сөздөрүмдү музыка аркылуу жеткириш керек экенин түшүндүм. Мындан ары патриоттук духтагы, дем берүүчү чыгармаларды ырдайм. Кийинки ырларым боордош казактарга, өзбектерге жана башка улуттарга арналат. Мындан ары ырчылыкка басым жасайм.

Клипти тарттырууда тажрыйбалуу адамдар менен иштештим. Клип 1 аптанын ичинде тартылып, даяр болду. Сүйгөн ишиңди жасаганда кыйынчылыктар билинбей өтүп кетет эмеспи. Айтор, ыр жаздырууда, клип тарттырууда кыйналган жокмун, эргүү алдым", - деп билдирди.

Ал эми клипте көчө шыпыргычтын ролун модель Рафкат Бакаев жараткан. Ал клипке тартылгандан кийин жашоодогу кыйынчылыктардын кандай болорун жон териси менен сезгенин айтат.

"Тартуу иштери болуп жатканда аба ырайы суук болчу. Анын үстүнө адамдар тоскоолдук жаратып ары-бери өтө берет экен. Ошондо көчө шыпыруунун канчалык оор жумуш экенин түшүнүп, жумушчулардын кадырын билдим", - дейт.

Ырчы болуу бала кезиндеги кыялы экенин айткан Гүлзат Мамытбек ырдап чыккандыгынын себебин айтып берди.

"Кичинекей кезимде ырчы болом десем, апам "артисттер жеңил ойлуу болушат, аларга карата ар кандай жаман да, жакшы да сөздөр айтылат. Ырчы болуунун кажети жок" деп койгон. Бир жолу үйгө меймандар келип "ким ырдайт?" дегенде чуркап барып ырдап койгом. Коноктор кеткенден кийин апам катуу урушкан. Ошондо үнүм буулуп, ырдай албай калгам. Азыр деле үнүмдү калыбына келтире албай, вокал боюнча сабак алып жатам. Биз, адамдар бири-бирибизге жардам берүүгө укуктуубуз. Мен башкаларга ырым менен моралдык жактан болсо дагы жардам берем, алдыга сүрөйм. Мен деле башкаларды көрүп таасирленем, аларды көрүп шыктанам. Мисалы, орусиялык Ольга Бузованын тытынып иштегенин көрүп "азамат!" деп баа берем, сыйлайм. Бирок чыгармачылыгын сыйлабайм деле".

Кыргыз деми ырчылыктан тышкары тасма жаатында дагы өзүн сынап, чоң долбоорлорду ишке ашыруунун үстүндө иштеп жатыптыр.

"Мен "Манас" тууралуу тасма тартууну пландап жатам. Эквадорго барганда кинопродюсерлердин бири менен таанышып калдым. Алар менен оюмду бөлүшсөм, дароо колдоп, англис тилинде тарталы деди. Буюрса, бул ишти колго алабыз. Мындан тышкары Эквадордон дагы бир клип тарттырам", - деди ырчы.