Ички иштер министри: "Бурулайдын атасы жолугушууга келбей койгон"

Бурулайдын атасы жолугушууга келбей койгон. Бул тууралуу Ички иштер министри Кашкар Жунушалиев маалымат жыйынында билдирди.

Анын айтымында, милиция бөлүмүндө бычакталып каза болгон Бурулайдын атасы Турдали Кожоналиев жолугушуудан өзү баш тарткан.

"Бурулайдын атасы менен менин орун басарым жолуккан. Өкмөт башчы Турдали Кожоналиевди кабыл алуу тапшырмасын бергенде мен чет өлкөдө элем. Келгенден кийин аны жолугушууга чакыртсам, адвокаттарынын бошобой калганы себеп болуп келген эмес", - деди ички иштер министри.

Окуянын чоо-жайына кайрылсак: Ушул жылдын 27-май күнү Бишкек шаарында жигит кызды ала качып бара жаткандыгы боюнча милицияга маалымат түшкөн. Көп узабай жигит менен кыз бара жаткан унаа Сосновка айылындагы посттон токтотулуп, Жайыл райондук ички иштер бөлүмүнө жеткирилген.

Милиция бөлүмүндө жигит кызга, андан соң өзүнө бычак сайып, оор абалда экөө тең ооруканага жеткирилген. Кыз алган жаракатынан улам көз жумган. Каза болгон кыз 20 жаштагы Бурулай Турдали кызы, ал эми жигит 29 жаштагы Марс Бөдөшов экендиги анык болгон. Бурулай Турдали кызы борбор шаардагы медициналык окуу жайлардын биринде окуй тургандыгын жана ушул жылдын август айында Марс Бөдөшовго эмес, башка жигитке турмушка чыгууга даярданып жатканын жакындары айтып беришкен.

4-июнда Бурулайдын өлүмү боюнча 23 милиция кызматкерине чара көрүлүп, анын катарында Чүй ОИИББинин башчысы Нурлан Сарчаев кызматтан алынган. Жайыл райондук прокуратурасы Кылмыш-жаза кодексинин 316-беренеси (шалаакылык) боюнча Жайыл РИИБинин кызматкерлерине кылмыш ишин козгогон. Милиция кызматкерлерине карата козголгон кылмыш иши дагы Жайыл райондук сотунан облустук сотко өткөрүлүп берилген.