Милиция бөлүмүндө бычакталып каза болгон Бурулай боюнча кезектеги соттук отурум башталды

Бүгүн Бишкекте Свердлов райондук сотунун сот залында милиция бөлүмүндө бычакталып каза болгон Бурулай Турдали кызынын ишине байланыштуу кезектеги соттук отурум башталды. Айыпталуучулар сот залына алып келинди. Сот отурумду ачык деп жарыялап, күбөлөр сурала тургандыгы боюнча маалымат берди. Күбөлөрдүн бири Гүлбарчын Байгашкаева суралып жатат.

Окуянын чоо-жайына кайрылсак: Ушул жылдын 27-май күнү Бишкек шаарында жигит кызды ала качып бара жаткандыгы боюнча милицияга маалымат түшкөн. Көп узабай жигит менен кыз бара жаткан унаа Сосновка айылындагы посттон токтотулуп, Жайыл райондук ички иштер бөлүмүнө жеткирилген.

Милиция бөлүмүндө жигит кызга, андан соң өзүнө бычак сайып, оор абалда экөө тең ооруканага жеткирилген. Кыз алган жаракатынан улам көз жумган. Каза болгон кыз 20 жаштагы Бурулай Турдали кызы, ал эми жигит 29 жаштагы Марс Бөдөшов экендиги анык болгон.

Бурулай Турдали кызы борбор шаардагы медициналык окуу жайлардын биринде окуй тургандыгын жана ушул жылдын август айында Марс Бөдөшовго эмес, башка жигитке турмушка чыгууга даярданып жатканын жакындары айтып беришкен.