Жыл башынан бери милиция кызматкерлеринин үстүнөн 1 миң 800дөн ашуун арыз түшүп, анын 212си гана далилденген

Жыл башынан бери терс себептер менен 138 кызматкер Ички иштер органдарынын катарынан бошотулуп, 204 милиция кызматкери ээлеген кызмат ордунан четтетилген. Бул тууралуу маалымат ИИМдин 9 айда аткарган ишинин жыйынтыгында айтылды.

Ал эми милиция кызматкерлерине карата жарандар тарабынан 1 миң 857 арыз-даттануу келип түшүп, анын 212си гана далилденген.

Ички иштер министри Кашкар Жунушалиевдин айтымында, мындай фактыларга жол бербөө үчүн өздүк курамдын ичинде тиешелүү иш-аракеттер жүрүүдө.

"Айрыкча коррупцияга байланышкан кылмыштар менен мыйзам бузуулардын бетин ачуу жана ага байланышкан кызматкерлерди аныктоо аракеттери жүрүп жатат", - деди министр.

Ал эми жарандарды мыйзамсыз кармоо жана уруп-сабап, укуктарды бузууга барган фактылардын бетин ачуу үчүн тиешелүү иш-аракеттер улантылып жатканын кошумчалады.