Бурулайдын өлүмү боюнча соттук отурум: Мечиттин имамы адам тарабынан кыйналып өлтүрүлгөн маркумдун денеси жуулбай көмүлөрүн айткан

Милиция бөлүмүндө бычакталып каза болгон Бурулай Турдали кызынын өлүмү боюнча соттук отурум 30-31-октябрь күндөрү уланат. Бүгүн 25-октябрда келе турган күбөлөр толук келишкен эмес. Алардан үчөө келген.

Күбөлөрдүн бири Бурулай Турдали кызы ала качылган күнү дүкөндө соода кылып отурган Гүлбарчын Байгашкаева, кызды ала качып кетип баратышканда унааны токтотууга аракет жасап, кийин Турдали Кожоналиев менен бирге ала качкандардын артынан кууган классташы Михаил Васильев суралышты. Үчүнчү күбө катары Бурулай Турдали кызынын жаназасын окууга чакырылган жергиликтүү мечиттин имамы Ислам Мамаев суралды.

Ислам Мамаев маркум Бурулайды өлүкканадан алынып келинери менен сөөгүн жуубастан дароо көмгүлө деген сунушун айткан.

"Мага 2 бала келип жаназа окуп бериңизчи дешти. Барсам, кыз кыйналып, адам тарабынан өлтүрүлгөн экен. Мындай учурда шарият боюнча сөөк жуулбастан көмүлөт. Мен ал жакта аялдардын ыйлап, көздөрү шишип калганын көрүп, денени эртерээк жерге берели дедим. Себеби канчалык эрте көмүлсө ошончолук ый эрте токтойт", - деди.

Соттук отурумдан соң жабырлануучу тараптан Турдали Кожоналиевге жолугуп, имамдын көрсөтмөсү боюнча пикирин уктук.

"Молдо келип кызымды эртерээк көмгүлө, өлүкканадан кепинделип даяр келиптир, ачпагыла деди. Көрсөтмөсүндө кыздын денесин ачып караган эмесмин дейт. Ачпаса анын кепинделгенин кайдан көрөт? Ал сөөктү жуубагыла деди. Биз болбой эле денени жууйлу деп, аялдар ачып карашты. Ошондо гана баягы көкүрөгүнө бычак менен тилип жазылган жазууларды көрдүк. Имам эмнеге анын денесин ачтырбай жатканын түшүнбөйм", - деди ал.

Жабырлануучу тараптын жактоочусу бул боюнча Муфтияттан илимдүү адамдарга кайрылганда, киши колдуу, кыйналып өлгөн адам деле майрам сууга (денени жуу тартиби) алынат деген жоопту алган.

Ал эми күбө Мамаев "шарият боюнча адам тарабынан кыйналып каза болгон маркум жуулбайт, андай шариятта жок. Бирок кыргыздын салтында мындайга көңүл бурулбастан жуулуп көмүлө берет" деди.

Окуянын чоо-жайына кайрылсак: Ушул жылдын 27-май күнү Бишкек шаарында жигит кызды ала качып бара жаткандыгы боюнча милицияга маалымат түшкөн. Көп узабай жигит менен кыз бара жаткан унаа Сосновка айылындагы посттон токтотулуп, Жайыл райондук ички иштер бөлүмүнө жеткирилген.

Милиция бөлүмүндө жигит кызга, андан соң өзүнө бычак сайып, оор абалда экөө тең ооруканага жеткирилген. Кыз алган жаракатынан улам көз жумган. Каза болгон кыз 20 жаштагы Бурулай Турдали кызы, ал эми жигит 29 жаштагы Марс Бөдөшов экендиги анык болгон.

Бурулай Турдали кызы борбор шаардагы медициналык окуу жайлардын биринде окуй тургандыгын жана ушул жылдын август айында Марс Бөдөшовго эмес, башка жигитке турмушка чыгууга даярданып жатканын жакындары айтып беришкен.