Кытайда смартфонун колунда өтө көп кармаган аялдын манжалары иштебей калды

Кытайдын Чанша шаарында жашаган аял бир апта бою телефонун демейдегиден көп кармап, анын айынан манжалары ийилбей калды. Бул тууралуу чет элдик маалымат булактары жазып чыгышты.

Маалыматта жазылгандай, мындай кырдаалга туш болгон аял эмгек өргүүсүнө чыккандан кийин күндүз эртеден кечке телефонун кармап отурган. Ал түндө уктаганда гана смартфонун колдон түшүргөн. Андан бир апта өтүп аял өзүнүн оң колунун сөөктөрү ооруй баштаганын сезген. Ага катар эле манжаларын мурдагыдай башкара албай, алар ийилбей калган.

Дарыгерлер анын колдору бир эле кыймылды күн сайын өтө көп кайталагандыктан муун тарамыштары сезгенгенин аныкташкан. Дарыгерлердин жардамы менен анын манжаларынын кыймылы калыбына келген. Бирок ак халатчандар ага кол телефонду ашыкча пайдаланууга тыюу салган.