Казакстандык рэп аткаруучу Скриптонит Бишкектеги милиция кызматкерлеринин жагымсыз иштеринен кийин Кыргыз өлкөсүнө башка келбей тургандыгын билдирди

Скриптонит каймана аты менен таанымал казакстандык рэпер Адил Жалелов экинчи Кыргыз өлкөсүнө, тактап айтканда, Бишкек шаарына келбей тургандыгын күйөрмандардын суроосуна жооп берип жатып билдирди.

Маалыматка ылайык, күйөрман "Бишкек сиз үчүн жабык тема деп уктум? Эмне себептен ушундай? Бишкектин тургундарынын баары сенин ырларыңды угат жана сенин келишиңди күтүп жатат" деген суроо узаткан. Өз кезегинде ырчы ал Бишкекке концерт коюп келген учурда жагымсыз окуяга кабылганын жана анын мындай чечимге келишине Бишкек шаарынын милициясы күнөөлүү экенин айткан.

"Ал жакта биз жагымсыз окуяга туш болгонбуз. Милиция кызматкерлери бизге жалаа жапканга аракет кылган. Биз акча берип кутулганбыз. Мен ал нерсени эстегим келбейт жана ал жакка баргым келбейт. Бул жерде Бишкек шаарынын тургундарынын эч кандай күнөөсү жок. Бардыгына милиция күнөөлүү", - деген оюн айткан ырчы.

Ал эми алып баруучунун "видео байланыш аркылуу Бишкек шаарындагы угармандарыңа концерт берүүгө даярсыңбы?" деген суроосуна ырчы даярмын деген жообун узаткан.

Эскерте кетсек, Скриптонит акыркы жолу Бишкек шаарына 2015-жылы келген. Анда ал түнкү клубдардын биринде өзүнүн альбомун алгачкы болуп Бишкектеги угармандарына тартуулаган.