Ысык-Көлдө 25 жаштагы жаранды диний көз караштан улам сабады делгендер үй камагына бошотулду

Ысык-Көлдө 25 жаштагы жаранды диний көз караштан улам сабады делгендер үй камагына бошотулду. Мындай чечим Ысык-Көл райондук соту тарабынан кабыл алынганын SUPER.KG'ге облустук милициядан кабарлашты.

Маалым болгондой, бүгүн, 26-октябрда райондук сот Тамчы айылында жаранды сабады делген Заманбек жана Ислам аттуу шектүүлөрдүн баш коргоо чарасын карап, жыйынтыгында үй камагына чыгаруу чечимин кабыл алган.

Облустук милициянын маалыматына караганда, 16-октябрда Ысык-Көл РИИБине Кароол-Дөбө айылынын 25 жаштагы Элдос аттуу тургуну арыз менен кайрылган. Арызда таякесинин Тамчы айылындагы үйүн убактылуу карап, жашап жатканда 16-октябрга караган түнү үч жаран аны сыртка чакырып алып сабап салганын көрсөткөн.

Бирок жакындары айрым ЖМКларга алар Элдосту "эмнеге сен өз Кудайың тууралуу музыка угуп жатасың, ислам динин кабыл алып, келме келтир" деп сабап койгонун айтышкан. Бирок милиция уруш диний көз караштан улам чыкканын төгүндөгөн.

Факты боюнча Кылмыш-жаза кодексинин 234-беренеси (бейбаштык) боюнча иш козголуп, шектүү катары Заманбек жана Ислам аттуу эки жаран кармалып камакка алынган болчу.