"Мындай биздин эле өлкөдө бар". Депутат Кыргыз жергесинде гана ашууларда жолго кум кол менен чачыларын айтты

"Кышкысын жолго кумду кол менен чачуу биздин эле өлкөдө бар” деп бүгүн, 29-октябрда парламенттин Бюджет жана финансы комитетинин отурумунда депутат Сайдулла Нышанов айтты.

Ал жол тазалоочу техникаларды заманга ылайык техникаларга алмаштыруу керектигин белгиледи.

“Бизде кышында Төө-Ашуу, Ала-Бел жана башка ашууларда жол тайгак болуп тоскоолдуктар жаралат. Ал жерде жолго кумду кол менен чачышат. Мындай ыкма дүйнө жүзү боюнча биздин эле өлкөдө калган болуш керек. Жолго кум чачуунун пайдасы аз. Кийинки жылдын бюджетине киргизип, 20-30 атайын техникаларды алсак жакшы болмок. Азыр бир эле учурда карды күрөп, артынан кум чачып кеткен техникалар бар. Кийинки жылдын бюджетине ушул маселени да киргизсеңер”, - деп Нышанов вице-премьер-министр Замирбек Аскаровго кайрылды.