Каржы полициясы 4 ай аралыгында атайын эсепке 197 миллион 413 миң сом төктү

Экономикалык кылмыштарга каршы күрөшүү боюнча мамлекеттик кызматы (Каржы полициясы) коррупциялык иштерден өндүрүлгөн каражаттар үчүн ачылган эсепке дагы 6 миллион 721 миң акча которду. Бул тууралуу 29-октябрда SUPER.KGʹге аталган мекеменин басма сөз катчысы Анастасия Пискур кабарлады.

"Бул акчалар экономикалык кылмыш боюнча козголгон иштерден улам мамлекетке келтирилген зыяндын ордун толтуруудан чогулган. Жалпысынан Каржы полициясы атайын бирдиктүү эсепке 4 ай аралыгында 197 миллион 413 миң сом акча төктү", - деди ал.

Эскерте кетсек, 2018-жылдын 3-июлунда коррупциялык иштерден өндүрүлгөн каражаттар үчүн атайын эсеп ачылган. Ага экономикалык жана кызматтык кылмыштардын айынан мамлекетке келтирилген зыяндын ордун толтуруу максатында өндүрүлгөн акчалар түшөт.