Башкы прокуратура бирдиктүү депозиттик эсепке 2 миллион сомдон ашуун каражат которду

Кыргыз Республикасынын Башкы прокуратурасы бирдиктүү депозиттик эсепке 2 миллион 259 миң 084 сом которду. Маалыматты аталган органдын маалымат кызматы билдирди.

"Бул сумма кызматтык жана экономикалык кылмыштар боюнча мамлекетке келтирилген зыяндарды кайтаруунун эсебинен чогулган. 2018-жыл боюнча которулган жалпы сумма 30-октябрга карата 134 миллион 872 миң 168 сомду түзөт", - деп жазылат маалыматта.

Айта кетсек, 22-июнда премьер-министр Мухаммедкалый Абылгазиев коррупциялык иштерден өндүрүлгөн каражаттар үчүн атайын эсеп ачуу боюнча токтомго кол койгон.

Токтомго ылайык, бул эсепке экономикалык жана кызмат адамдарына козголгон кылмыш иштеринин алкагында алынган каражаттар топтолот. Анда мамлекетке келтирилген чыгымдар кайтарылып, өзүнчө эсепте сакталып, өкмөттүн чечими менен бөлүштүрүлөт.