Аида Касымалиева айтып чыккан маселелер боюнча Эмгек жана социалдык өнүктүрүү министрлигине эскертүү берилди

Жогорку Кеңештин депутаты Аида Касымалиева айтып чыккан маселелер боюнча Эмгек жана социалдык өнүктүрүү министрлигине эскертүү берилди. Бул тууралуу Башкы прокуратуранын маалымат кызматы кабарлады.

"Башкы прокуратура Аида Касымалиева тарабынан айтылган Эмгек жана социалдык өнүктүрүү министрлигине бөлүнгөн каражаттарды башка максатта колдонуу фактысы боюнча текшерүү жүргүздү.

Анын жыйынтыгы боюнча, 12-октябрда аталган министрлик тарабынан Финансы министрлигине социалдык жөлөк пулдарды төлөөдөн үнөмдөлгөн каражаттарды башка максаттарга пайдалануу үчүн 2018-жылга чыгашалардын тизмесин өзгөртүүнү сунуштаган кат жиберилгени аныкталды.

Бюджет кодексине ылайык, бюджеттин чыгаша бөлүгүнө өзгөртүү киргизүү каралган эмес. Буга байланыштуу министрлик жиберген чыгашалардын тизмесин өзгөртүүнү сунуштаган кат негизсиз жана мыйзамсыз болуп эсептелет.

Текшерүүнүн жыйынтыгынын негизинде Эмгек жана социалдык өнүктүрүү министрлигине мындай мыйзам бузууларга жол бербөө тууралуу эскертүү жарыяланды", - деп айтылат маалыматта.