Баткендеги 22 адам жабыркап, 1 адамдын өмүрүн алган жол кырсыгы. Буттары сынган 7 жүргүнчүгө операция жасалат

Баткен облусунда 17-октябрда Ош-Баткен-Исфана унаа жолунда эки Мерседес-Бенц-Спринтер унаалары сүзүшүп, 22 адам ар түрдүү жаракаттарды алып, 1 адам каза болгон.

Учурда жол кырсыгынан жабыркап, ооруканада жаткан 7 адамга операция жасалат. Бул тууралуу бүгүн, 30-октябрда SUPER.KG порталына облустук оорукананын башчысы Нурлан Салиевге байланышканыбызда билдирди.

Маалыматка ылайык, облустук оорукананын жандандыруу бөлүмүндө 2 адам оор абалда жатат.

"Оорукананын жандандыруу бөлүмүндө жаткан 2 адамдын абалы боюнча айтсам, кичине жылыш бар. Бирок абалдары оор бойдон калууда. Ал эми жол кырсыгынан буттары сынган 7 адамга жакынкы убакыт аралыгында операция жасалат. Операция качан жасаларын так айта албайм, себеби бейтаптардын абалына карайбыз. Ал үчүн тиешелүү анализдерди тапшырып, бейтаптарды көзөмөлдөп жатабыз", - деди оорукананын башчысы.

Эске салсак, 17-октябрда эки Мерседес-Бенц-Спринтер унаалары бетме-бет сүзүшкөн. Натыйжада 22 адам ар түрдүү жаракаттарды алып, 1 адам оор жаракат алганынан улам каза болуп калган.