Жалал-Абадда жаран баңгизат менен кармалды

Жалал-Абад облусунун Тогуз-Торо районунун жараны үйүнө жана унаасына баңги затын сактап жүргөн жеринен кармалды. Бул тууралуу Жалал-Абад ОИИБинин басма сөз кызматы билдирди.

Маалыматка ылайык, 26-октбярда Ауди-100 үлгүсүндөгү унаа Казарман айылынын Нур-Жайык кичи шаарчасындагы үйлөрдүн биринин алдында токтоп турган учурда милиция кызматкерлери текшерүүгө алышкан. Унаага тинтүү жүргүзүү убагында салондун алдыңкы айдоочу отурган төшөлгөсүнөн көк түстөгү целлофанга оролгон баңгизат табылган. Ошондой эле далил катары бир даана тамеки, 1 даана скотч менен ширенке жана клей алынган.

"Кармалган жаранга карата кылмыш иши козголуп, шектүү М.Б.нын үйү да текшерүүгө алынган. Текшерүүнүн жыйынтыгында шектүүнүн үйүнөн 105 грамм өлчөмүндөгү баңгизат, ошондой эле аны даярдоого колдонулган буюмдар табылган. Учурда алынган буюмдар химиялык экспертизага жөнөтүлүп, шектүү Тогуз-Торо райондук сотунун чечими менен эки айга камакка алынды. Учурда тергөө жүрүүдө", - деп билдирет басма сөз кызматы.