Түптөн Бишкекке кеткен бойдон 20 күндөн бери дайынсыз болуп жаткан Кымбат Акылбек кызы апасына байланышка чыкты

10-октябрь күнү Түп районунун Долон айылындагы үйүнөн Бишкекке кеттим деп чыгып кеткен бойдон дайынсыз болуп жаткан 22 жаштагы Кымбат Акылбек кызы апасына байланышка чыкты. Бул тууралуу бүгүн, 31-октябрда анын апасы Мира Кенжекараева SUPER.KG порталына кабарлады.

Кенжекараеванын айтымында, кызы уюлдук телефонун жоготуп жиберген.

"Мындан улам менин телефон номеримди эстей албай жүрүптүр. Ага катар эле сыркоолоп калып, ооруканага жатып чыгыптыр. Ооруканадан чыгып жумушуна барганда гана менин издеп жатканымды чогуу иштегендерден угуптур. Кечээ байланышка чыгып, номериңизди сураштырып жатып таптым деди. Кантсе да кызымдын аман экенин угуп санаам тынчый түштү. Мени менен кошо санаа тарткандарга кабарлап коюуну туура көрдүм", - деди ал.

Айта кетсек, Мээрим Акылбек кызы Бишкек шаарында тигүүчү болуп эмгектенет. 7-октябрда Долондогу үйүнө барып, 10-октябрда кайра Бишкекке кеттим деп чыккан бойдон дайынсыз болуп жаткан. Анын 9 айлык уулу апасы Мира Кенжекараеванын колунда.