Икрамжан Илмияновдун мугалими: "Икромжон", "кадыры жок кадр" деген сөздөрдү угуп, жүрөгүм ооруйт"

“Икрамжан Илмияновго карата айтылган “Икромжон”, “кадыры жок кадр” деген сөздөрдү угуп, жүрөгүм ооруйт. Бизди сөзсүз эле чет жактан билим алып келгендер башкарышы керекпи?” - деп бүгүн, 31-октябрда Бишкек шаардык сотуна Илмияновду үй камагына чыгаруу талабы менен чогулган анын тарапташтарынын бири Аким Таштемиров билдирди.

Таштемиров бир кезде Икрамжан Илмияновдун мугалими болгонун айтып, анын жаман иштерге аралашарына ишенбей турганына токтолду.

“Мен Икрамжан Илмияновду кичинекей чыт курсак кезинен бери билем. Ал Баткен облусунун Лейлек районундагы Козу-Баглан орто мектебин бүтүргөн. Илмиянов жашынан зирек, зээндүү, сабакты жакшы окуп, спорт менен машыккан бала болчу.

Мен дайыма байкайм, массалык маалымат каражаттарына ал тууралуу ар кандай каралоолор жарыяланып келет. Ал карапайым үй-бүлөдөн чыккан. Жогорку билимдүү, диплому бар. Эгер акыл-эси болбосо, ушунчалык чоң кызматтарда иштейт беле?

Азыр интернетте коркунучтуу кылмышкерди кармап келгендей маалыматтар чыгып жатат. Мен анын жаман иштерин көргөн эмесмин. Анын күнөөсү бар же жок экенин билбейбиз. Тиешелүү адамдар териштирет. Массалык маалымат каражаттарына жазылып жаткан “Кадыры жок кадр” деген эң катуу сөз. Бизди сөзсүз эле чет жактан билим алып келгендер башкарышы керекпи? Менин оюмча, бизди карапайым үйдөн чыккан, элдин жашоо турмушун жакшы билген адам башкарышы керек. Президент болуучу адам асмандан түшмөк беле, ал деле учурунда шоопур болот, кой кайтарат”, - деди ал.

Бүгүн, 31-октябрда Бишкек шаардык соту Икрамжан Илмияновдун баш коргоо чарасын карап, райондук соттун айаталуучуну 28-ноябрга чейин УКМКнын СИЗОсунда калтыруу чечимин күчүндө калтырды.

Буга чейин Икрамжан Илмиянов 2018-жылдын июнь айында өлкөдөн чыгып кетип кайрылып келбегени маалымдалган. Ага УКМК тарабынан "алдамчылык" боюнча кылмыш иши козголуп, 18-октябрда Биринчи Май райондук соту аны сырттан камакка алуу чечимин чыгарган. 19-октябрда Илмияновдун кармалганы белгилүү болгон. 20-октябрда аталган сот Илмияновдун баш коргоо чарасын карап, аны 28-ноябрга чейин УКМКнын СИЗОсунда кармоо чечимин чыгарган.