Алматыда аял кызынын башындагы битти тазалайм деп жатып өлтүрүп алды

Алматыда аял кыздарынын башындагы биттерди кетирем деп малдагы кенени кетирүүчү каражат менен жууган. Анын кесепетинен 2 жашар кызы чарчап калды. Бул тууралуу казакстандык басылмалар жазып чыгышты.

Облустук Саламаттыкты сактоо башкармалыгынын тараткан маалыматына ылайык, окуя Туганбай айылында болгон.

"Айылдын тургуну өзүнүн 5 жана 2 жаштагы кыздарынын башын биттен арылтуу үчүн "неоцидол" каражатын колдонгон. Ал каражат менен сууну аралаштырып кыздарынын башын жууган. Көп өтпөй кыздары өздөрүн жаман сезип, ооздорунан көбүк чыга баштаган. Ооруканага барганда 2 жаштагы кызы чарчап калган. Азыркы тапта 5 жаштагы кыз ооруканада, абалы туруктуу", - деп жазылат маалыматта.

Неоцидол – ветеринардык каражат. Аталган каражат мал жандыктарын котур оорусунан жана бүргөлөрдөн арылтуу үчүн колдонулат.