Унааларды каттоодо жаңы системди ишке киргизүүдө көйгөй жаралды. Каттоо кызматы себебин түшүндүрдү

Өлкө боюнча унааларды каттоодо көйгөй жаралды. Мамлекеттик каттоо кызматынын басма сөз катчысы Мелис Эржигитов аталган маселе боюнча SUPER.KG’ге 4-ноябрда түшүндүрмө берди. Анын айтымында, Каттоо кызматы унааларды каттоого алуу үчүн жаңы автоматташтырылган үч систем ишке киргендиктен аны жөнгө салууда маселе жаралууда. Эржигитов 10 күндүн аралыгында иш өз нугуна түшүп калат деп ишендирди.

“Айдоочулук курамды, транспортту каттоо жана айдоочулук күбөлүктү алуу боюнча жаңы автоматташтырылган системди ишке киргиздик. Эми биздин ишибиз 100 пайыз электрондук форматта жүрөт. Бирок систем жаңы болгондуктан маселе жаралууда. Акырына чейин жасалбай калган жумуштар болуп калган экен. Анын үстүнөн иштеп 10 күнгө чейин маселени таптакыр жоёбуз.

Бул жаңы систем каттоого алынып жаткан унаанын тарыхын, айдоочусунун өмүр баяны көрсөтүп берип турат. Анда биздин база, Салык кызматынын, Бажы кызматынын жана милициянын базасы менен биргеликте иш алып барат. Эгерде унаа жаңыдан алынып келген болсо, анын бажы салыгы төлөгөнбү же төлөгөн эмеспи, ошондой эле издөөдө жүргөн унаа эмеспи деген маалыматтарды ала алабыз”, - деди Эржигитов.