"Шадиев жүрөк оорусунан дарыланып жүрөт" дейт жактоочусу

Аскарбек Шадиев жүрөк оорусуна байланыштуу АКШга кеткенин бүгүн, 5-ноябрда SUPER.KG порталына анын жактоочусу Учкун Каримов билдирди. "Ал буга чейин деле жүрөк оорусу менен жабыркап, дарыланып келген. Алгач ал Москвага, кийин Нью-Йоркко кеткен экен", - деди Каримов.

Адвокаттын айтымында, Шадиев аны менен өзү байланышкан эмес. "Шадиевдин укуктарын коргоо үчүн мени анын туугандары жалдап, келишим түзүштү", - деп баса белгиледи адвокат.

Окуянын чоо-жайы:

Ушул жылдын 29-апрелинде Аскарбек Шадиевге карата “кызматынан кыянаттык менен пайдалануу” беренеси боюнча Башкы прокуратура кылмыш ишин козгогон. 1-июнда УКМК Шадиевдин 27-апрелде Кыргыз өлкөсүнөн чыгып, АКШга кетип калганын аныктаганын билдирген.

25-июнда ага карата “чек араны мыйзамсыз кесип өтүү” беренеси боюнча кылмыш иши козголгон. 2-июлда Башкы прокуратура дагы бир кылмыш ишин козгоп, ал “мыйзамсыз жол менен алынган акчалай каражаттарды же башка мүлктү легалдаштыруу” беренесинин негизинде ачылган. 20-октябрда Шадиевдин иши боюнча тергөө аяктап, Башка прокуратура ишти сотко өткөргөн. 2-ноябрда Аскарбек Шадиев Жогорку Кеңештин депутаты мандатынан ажыратылган.