"Бул туура эмес". Премьер-министр Кыргыз экономикасы "Кумтөрдөн" көз каранды болуп калганын айтты

"Экономикабыздын абалы "Кумтөр" алтын кенинен көз каранды болушу жакшы эмес". Бул тууралуу премьер-министр Мухаммедкалый Абылгазиев бүгүнкү 6-ноябрдагы өкмөт жыйынында айтты.

Өкмөт башчы "Кумтөр" кениндеги алтындын үлүшү азайганына байланыштуу башка кендерди иштетүүгө шарт түзүлүшү керек экенин кошумчалады.

“Өткөн жылы "Кумтөр" 17,5 тонна алтын өндүргөн. Учурда кендин курамындагы алтындын үлүшү азайганына байланыштуу быйылкы жылы 16 тонна алтын өндүрүлөрү күтүлүүдө. Былтыркыга салыштырмалуу 1,5 тоннага аз болууда. Биз буга карабай башка алтын кендерин иштетүүгө, аларга шарт түзүп берүүгө күчүбүздү жумшашыбыз керек. Бир чоң кенден экономикабыздын көз каранды болушу туура эмес. Алдыда тышкы карызды төлөөнүн оор графиги келе жатат. Пенсиянын көлөмүн жана маяналарды көтөрүү керек. Мунун баарын аткаруу үчүн бирдиктүү иш алып баруубуз зарыл”, - деди өкмөт башчы.