Чүйдө жарандын 17 миң евро акчасын алып, изин жашырып кеткен аял кармалды. Милиция андан жабыркагандарды издейт

Чүй облусунда жаранды алдап, акчасын көбөйтүп берем деген убада менен 17 миң евро акчасын алып, изин жашырып кеткен аял кармалды. Учурда милиция сүрөттөгү аялдын аракеттеринен жабыркагандарды издөөдө. Бул тууралуу бүгүн, 7-ноябрда Чүй ОИИББинин басма сөз кызматынан билдиришти.

Маалыматка ылайык, милицияга арыз менен Р.А. аттуу жаран кайрылган. Анда ал тааныш аял анын ишенимине кирип, акчасын бир фирмага салып "көбөйтүп берем" деген жүйөө менен 17 миң евро акчасын алып, изин жашырып кеткенин билдирген. Жүргүзүлгөн иликтөө иштеринин алкагында кылмышка шектүү катары 1967-жылы туулган аял кармалган. Факты боюнча Кылмыш-жаза кодексинин 166-беренеси (алдамчылык) менен кылмыш иши козголуп, ал камакка алынды.

"Кылмышка шектелип кармалган аял ушул сыяктуу дагы башка кылмыштарга да шектелүүдө. Эгер сүрөттөгү адамдан жабыркаган болсоңуздар Чүй ОИИББине кайрылууну өтүнөбүз же төмөнкү номурларга байланышыңыздар: 0 (312) 60-72-25, 0 (3138) 5-82-89, 0 (709) 15-53-15", - деп айтылат маалыматта.