Чүйдө Апрель окуясында жоголгон куралды сактап жүргөн адам кармалды

Бишкекте Апрель окуясында жоголгон куралды сактап жүргөн адам кармалды. Бул тууралуу Чүй ОИИБинин басма сөз кызматы билдирди.

Маалыматка ылайык, 30-октябрь күнү Криминалдык милиция кызматынын кызматкерлери 56 жаштагы Т.Т. аттуу жаран кармаган. Анын үйүнүн ичине тинтүү жүргүзүүдө Макаров үлгүсүндөгү тапанча жана 6 ок табылган. Табылган куралга экспертиза жүргүзүлүп, анын жыйынтыгында 2010-жылдагы Апрель окуясында жоголгон курал экени аныкталган. Бул факты боюнча Ысык-Ата РИИБи Кылмыш-жаза кодексинин 241-беренеси менен кылмыш иши козголгон. Ал эми кармалган шектүү 2 айга камакка алынган.

Ошондой эле кылмышка шектүү буга чейин да "адам өлтүрүү", "алдамчылык" беренелери боюнча соттолуп, уюшкан кылмыштуу топтун мүчөсү катары ИИМдин каттоосунда турган. Учурда бул боюнча тергөө иштери жүрүүдө.