Калифорния штатындагы токойдон чыккан өрт Парадайс шаарын жалмап кетти (сүрөт, видео)

Калифорниянын түндүгүндөгү токойдон чыккан өрт Парадайс шаарын күлгө айлантты. Маалыматты Sacramento Bee гезити жазды. Өрт бейшемби күнү эртең менен башталган. Акыркы маалыматтарга таянсак, өрт болжол менен 8 миң гектар жерди каптаган. Жергиликтүү маалымат агенттиктеринин жазганына караганда, миңдеген үйлөр күйүп кеткен.

"Шаар толугу менен жалынга капталган. Бул абдан коркунучтуу көрүнөт экен", - дейт кырсык болгон жерден үй-бүлөсү менен эвакуацияланган шаардык кеңештин мүчөсү Скотт Лоттер.

Шаардык бийлик жарыялагандай, жергиликтүү калк толугу менен эвакуацияланууда. Алар жалпысынан 27 миң адам. Шаардан чыгып кетип жаткан унаалардын тыгынынан улам жөө кетип жаткан адамдар да бар. Paradise Post басылмасы унаалар тыгынында калган кош бойлуу аялдын ошол жерден толгоосу башталганын жазды. Ошондой эле эки адам күйүктөн жаракат алган. Акыркы маалыматка таянсак, Бьютт округунан жалпы 50 миңдей калк башка жакка чыгарылды.

Учурда өрттү өчүрүү иштери уланууда.