Апрель окуясынын дагы бир баатыры көз жумду

Апрель окуясынын дагы бир баатыры - Каримжан Стамов көз жумду. Бул тууралуу "Айкөл Ала-Тоо" коомдук бирикмесинин төрагасынын милдетин аткаруучу Амантур Жамгырчиевге байланышканыбызда SUPER.KG'ге билдирди.

Маалыматка ылайык, маркум 61 жашында кечээ, 11-ноябрда каза болгон.

"Ал онкологиялык оорудан жабыркап жүргөн. Оору 3-баскычка өтүшүп кеткен экен. Жакында эле ооруканадан чыгарылган.

Карим агага 2010-жылы Апрель окуясында ок тийип, денесинен жеңил жаракат алган. Өзү абдан мекенчил адам эле, ар дайым өлкөнүн келечегине күйүп, колунан келген иштерди жасады.

8 жылдан бери "Айкөл Ала-Тоо" коомдук бирикмесинин Бишкектеги Свердлов районундагы координатору, Аксакалдар кеңешинде да мүчө болуп, Апрель окуясын элге жайылтууда көп иштерди аткарды. 7-апрель боюнча макалалардын автору, Апрель элдик революциясы боюнча китеп жазып жаткан, жыйынтыктаганга жетишпей калды. Кесиби боюнча курулушчу", - дейт ал.

Жамгырчиев белгилегендей, 2010-жылдан бери Апрель окуясынын 49 баатыры каза болду. Алардын өлүмүнө түрдүү кырдаалдар себеп болууда. Бирок көбү октун кесепетинен дүйнө салып жатышат.

"Негизи Карим ага боорунан рак илдетине чалдыккан экен. Дарыгерлер консилиум кылып, анын ооруга чалдыгуусу, өлүмүнүн себеби тууралуу айтышат. Кантсе да октун кесепети тиет экен. Маркумдун сөөгү төрөлүп-өскөн жери - Талас облусунун Кара-Буура районундагы Бакайыр айылына жөнөтүлдү. Аны жерге берүү зыйнатына атайын бирикмеден акча бөлүнөт", - деди Жамгырчиев.

Айта кетсек, Стамовдун артында жубайы, 2 уулу, 1 кызы, 5 небереси калды.