Алиясбек Алымкуловго коюлган эстелик. "Көзү тирүү кишилерге эстелик коюлбай эле койсо болмок" дейт Талас облусунун башчысынын орун басары

Талас облусунун Бакай-Ата районундагы маданият үйүнүн алдында 20 адамдын эстелиги орнотулуп, ачылышы 10-ноябрда өткөн. Алардын арасында мурдагы жаштар министри, Апрель баатыры Алиясбек Алымкулов, социалисттик эмгектин баатыры Корчубек Акназаров жана авиация тармагында эмгек сиңирген Кубанычбек Козубековдун эстелиги коюлган.

Өкмөттүн Талас облусундагы өкүлүнүн орун басары Канымет Осмонбеков алардын эстелигин орнотууну айылдык кеңештин депутаттары чечкенин, бирок өзү туура эмес пикирде экенин SUPER.KG'ге 12-ноябрда кабарлады.

"Айылдык кеңештин депутаттарына кимдердин эстелигин орнотуу керектигин тактап бергиле деген сунуш жиберилген. Депутаттар элдин демилгеси менен район, облус жана республикалык деңгээлде эмгеги сиңген кишилерди тандап, чечим кабыл алышкан. Андан кийин чечим районго жиберилип, эстеликтер орнотулган.

Менин жеке пикиримде, көзү тирүү кишилерге коюлбай эле койсо болмок", - деди Осмонбеков.

Эстеликтерди тургузууга 2 миллион сом сарпталып, каражат эстелиги орнотулган атуулдардын жакындары жана коомдук уюмдар тарабынан чогултулган.