Саясий күчтөрдүн курултайында Алмазбек Атамбаев менен Сооронбай Жээнбековдун жана Жогорку Кеңештин ишине баа берилет

24-ноябрда саясий жана жарандык коом тарабынан уюштурулган республикалык курултай өтөт. Курултайда 4 багыт боюнча доклад жасалып, анда учурдагы президент Сооронбай Жээнбековдун бир жылдык, мурдагы президент Алмазбек Атамбаевдин алты жылдык жана Жогорку Кеңештин акыркы эки чакырылышынын ишине баа берилет.

Уюштуруу комитетинин төрагасы Кеңешбек Дүйшөбаев 13-ноябрда өткөргөн маалымат жыйынында курултайга жалпы 650 адам катыша турганын айтты.

"Ушул жылдын жаз айларында саясий, коомдук жана мекенчил күчтөр Туруктуу элдик кеңеш түзүп, анын негизинде курултай өткөрүү боюнча демилге көтөрүп чыкканбыз. 24-ноябрда ал курултайды өткөрүп жатабыз. Ага катышуу үчүн уюштуруу комитетине 10 саясий партия, 20дан ашуун өкмөттүк эмес уюмдар жана мекенчил жигиттерибиз өз катын жиберишти. Азыр деле катышуу максатында каттар келип жатат. Курултайга жалпы 650 адам чакырылат. Анда саясий партияларга 250, коомдук жана өкмөттүк эмес уюмдардын өкүлдөрүнө 150, мекенчил күчтөргө 150, жеке ишкер жана саясатчыларга 100 мандат берилет", - деди Дүйшөбаев.