Борбор калаанын көчөлөрүндө көйгөй жараткан жасалма дөңчөлөр

Бишкек шаарынын көчөлөрүнө орнотулган жасалма дөңчөлөр көптөгөн көйгөйлөрдү жаратып жаткандыгын айдоочулар айтып, нааразы болушууда. Алар кар жааган соң, дөңчөлөр убагында тазаланбагандыктан алды жапыз унаалар үчүн бийиктеп кетип жатат дешет.

Унаа ээлеринин айтымында көйгөйдү жаңы орнотулган кеңейтилген дөңчөлөр жаратууда. Бишкек шаардык мэриясынын басма сөз кызматынын билдиргенине ылайык, аталган дөңчөлөр "Бишкек асфальт сервис" ишканасы тарабынан орнотулган.

"Бишкек асфальт сервис" тарабынан орнотулган дөңчөлөр колдонууга берилген соң, алардын абалына, тазаланышына "Тазалык" ишканасы жооптуу болуп, көзөмөл кылышат", - дейт басма сөз кызматы.

"Тазалык" ишканасынын басма сөз кызматынын билдиргенине ылайык, шаар боюнча жалпы 130 жаңы жасалма дөңчөлөр бар.

"11-ноябрдан 12-ноябрга караган түнү жана 12-ноябрда кар токтоосуз жааганына байланыштуу "Тазалык" ишканасынын кызматкерлери күчөтүлгөн тартипте иштешти. Дүйшөмбү күнү таңкы саат 4:00дөн тартып жолдорду атайын унаалар менен катар, кызматкерлер да кол менен тазалап жатышты. Кар унаалар өткөндө эрип, кайра тоңуп атып дөңчөлөр муз болуп калган. Азыркы тапта да аларды тазалап жатабыз", - деп билдирди басма сөз кызматы.