Бишкек ЖЭБиндеги кырсыкка байланыштуу сот отуруму өтөт

Бүгүн, 15-ноябрда Биринчи Май райондук сотунда Бишкек ЖЭБиндеги кырсыкка байланыштуу козголгон кылмыш иштердин бирин кароо уланат. Буга чейинки 2-ноябрга белгиленген сот иши адвокаттардын келбей калгандыгына байланыштуу башка күнгө жылдырылган болчу.

Бул иш боюнча Кылмыш-жаза кодексинин 221-беренеси (коммерциялык уюмдарда иштегендердин кызмат абалынан кыянаттык менен пайдаланышы) менен иш козголуп, "Улуттук энергетикалык холдингдин" мурдагы башчысы Айбек Калиев, "Электр станциялары" ишканасынын жетекчисинин мурдагы орун басары Бердибек Боркоев, “Электр станцияларынын” мурдагы директору Узак Кыдырбаев жана ЖЭБди модернизациялоо долбоорунун аткаруучу директору Темирлан Бримкуловго айып тагылууда.

Ушул жылдын 26-январында Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Андан кийин ЖЭБди жаңылоого Кытайдан алынган 386 миллион доллар насыя туура эмес пайдаланганы ачыкка чыгып, 4 кылмыш иши козголгон. Анын негизинде энергетика тармагындагы ишканалардын жетекчилеринен тышкары мурдагы өкмөт башчылар Жантөрө Сатыбалдиев, Сапар Исаков, депутат Осмонбек Артыкбаев кармалган, Алар учурда УКМКнын тергөө абагында.