Депутат Момбеков Бишкектеги Киев көчөсүнө Чыңгыз Айтматовдун атын берүүнү сунуш кылды

Депутат Рыскелди Момбеков Бишкектеги Киев көчөсүнө жазуучу Чыңгыз Айтматовдун атын берүүнү сунуш кылды. Бул тууралуу ал бүгүн, 15-ноябрда Жогорку Кеңештин жыйынында билдирди.

"Чыңгыз Айтматовдун 90 жылдык мааракеси дүйнө жүзүндө белгиленип, ал иш-чаралар аяктап, жыйынтыкталып жатканы турат. Өзгөчө өзбек туугандарга рахмат айтышыбыз керек. Алар Ташкенттеги көчөгө Айтматовдун атын берди. Казак туугандарга да рахмат. Алар дагы чоң көчөсүнө биздин жазуучунун атын берди. Бизде эмне болду? Бишкектин билинбеген иши менен илинбеген бийлиги билмексенге салып койду. Борбор шаарыбызда Айтматовдун 90 жылдык мааракесинин алкагында бир дагы иш-чара өткөн жок. Бул уят нерсе. Эки даңазалуу инсан Манас атабыз менен Чыңгыз Айтматовдун атын бир көчөгө берип койду. Бул чолок, чоркок саясат. Бишкек шаардык кеңештин депутаттарынан сунуш түшпөсө, анда мен сунуш киргизем. Бул Белинский көчөсүн Манас проспектиси деп атаганыбыз оң, ал эми Киев көчөсүнө Чыңгыз Айтматовдун атын берели. Эгер биз эгемендүү мамлекет болсок эки залкар адамдардын атын эстешибиз керек", - деди Момбеков.