Сот аркылуу мамлекетке кайтарылган каражаттардын эсебинен прокуратура кызматкерлерине турак жай курулат

Кыргыз өкмөтүнүн чечими менен сот аркылуу мамлекетке кайтарылган каражаттын 30 пайызы же 100 миллион сом прокуратура органына берилди. Анын 91 миллион сому аймактарда оор шарттарда иштеген прокуратура кызматкерлерине турак жай курууга багытталат. Бул тууралуу Башкы прокуратуранын расмий сайтында айтылат.

Каражаттан Нарын облусуна - 44 миллион 400 миң сом, Баткен облусуна – 42 миллион 600 миң сом, Талас облусуна - 2 миллион сом, Жалал-Абад облусуна - 2 миллион сом бөлүнөт. Белгилүү болгондой, аймактарда кызматтык үйлөр биринчи жолу курулуп жатат. Курулуш иштери 2018-жылдын аягында бүтүрүү пландалууда.

Маалыматка караганда, прокуратура органы менен аймактык капиталдык курулуш башкармалыктарынын ортосунда келишим түзүлүп, азыркы тапта курулуш иштери жүрүп жатат.