Сингапурлук миллиардердин кызы Монголиядагы үйү жок тургундарга боз үй белек кылды

Сингапурлук миллиардер Питер Лимдин кызы Ким Лим Монголиядагы үйсүз тургундарга боз үй белек кылды. Чет элдик басылмалардын маалыматына ылайык, Ким Лим Монголияга барып келгенден кийин кайрымдуулук иш жасаган.

Ал Монголияга болгон сапары, кайрымдуулук иштери тууралуу социалдык тармактагы жеке баракчасына жазып чыккан. Анда Ким Лим карылар, балдар үйүнө барып тамак-аш, кийим-кече берсе, үйү жок тургундарга боз үй берген.

Ким Лим жергиликтүү маалымат булактарына кайрымдуулук иш жасоо тууралуу ой тасма көргөндөн кийин пайда болгонун билдирген. "Монголиядагы үйү жок тургундар тууралуу тасма көргөндөн кийин жардам берүү тууралуу ойлоно баштадым. Эне болгондон кийин балдарга кам көрүүнү жогору коюп калдым. Мындан улам кедей аймактарда жашаган балдарга көбүрөөк жардам берип, кубаныч тартуулагым келди. Анткени алардын келечеги бизден көз каранды. Балдар балалыгын бактылуу өткөрүүгө татыктуу", - деген ал.

Сингапурлук миллиардер Питер Лим бизнес-магнат, филантроп. Ал 2016-жылы Сингапурдагы эң бай адамдардын тизмесинде 11-орунда жайгашкан. Ошондой эле Питер Лим Испаниянын "Валенсия" футболдук клубунун 82,3 пайызына ээ.