ЖЭБдеги кырсыкка байланыштуу айыпталып жаткандардан 89 миллион сомдон ашык акча өндүрүү талап кылынды

Бүгүн, 15-ноябрда Бишкектин Биринчи Май райондук сотунда Бишкек ЖЭБдеги кырсыкка байланыштуу козголгон кылмыш иштердин бирин кароо улантылды.

Отурумдун жүрүшүндө "Бишкек жылуулук" менен "Электр станциялары" ишканасы энергетика тармагындагы ишканалардын мурунку жетекчилери Айбек Калиев, Бердибек Боркоев, Узак Кыдырбаев, Темирлан Бримкулов, Нурлан Өмүркул уулу, Нургазы Курманбеков жана Нурлан Садыковдон ЖЭБдеги кырсыкка байланыштуу 89 миллион сомдон ашык акча өндүрүп берүүнү талап кылды.

Сотто аталган эки ишкананын өкүлдөрүнө сөз берилип, алар кырсыктан "Электр станциялары" 8 миллион 800 миң, "Бишкек жылуулук" ишканасы 81 миллион сомдой зыянга учураганын айтышты. Бирок алар айыпталып жаткандардын жактоочуларынын суроолоруна так жооп бере алышкан жок.

Ишти карап жаткан судья Эмилбек Кайыпов соттук отурумду 20-ноябрга жылдырып, аталган эки ишканын өкүлдөрүн даярданып келүүнү өтүндү.

Ал эми соттун жүрүшүндө мамлекеттик айыптоочу жогоруда аты аталгандардын айыбын расмий угузуп, алар Кылмыш-жаза кодексинин 221-беренеси (коммерциялык уюмдарда иштегендердин кызмат абалынан кыянаттык менен пайдаланышы) менен козголгон кылмыш иштин негизинде айыпталып жатканын айтты.

Козголгон кылмыш иштин негизинде "Улуттук энергетикалык холдингдин" мурдагы башчысы Айбек Калиев, "Электр станциялары" ишканасынын жетекчисинин мурдагы орун басары Бердибек Боркоев, “Электр станцияларынын” мурдагы директору Узак Кыдырбаев жана ЖЭБди модернизациялоо долбоорунун аткаруучу директору Темирлан Бримкулов УКМКнын тергөө абагында отурса, калган үчөө үй камагында.

Ушул жылдын 26-январында Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Андан кийин ЖЭБди жаңылоого Кытайдан алынган 386 миллион доллар насыя туура эмес пайдаланганы ачыкка чыгып, 4 кылмыш иши козголгон. Анын негизинде энергетика тармагындагы ишканалардын жетекчилеринен тышкары мурдагы өкмөт башчылар Жантөрө Сатыбалдиев, Сапар Исаков, депутат Осмонбек Артыкбаев кармалган. Алар учурда УКМКнын тергөө абагында.