Каттоо кызматы Кулматовдун жарандыгы боюнча сотко берген арызын кайтарып алуунун себебин түшүндүрдү

Мамлекеттик каттоо кызматы Бишкектин мурдагы мэри Кубанычбек Кулматовдун ID жана жалпы жарандык паспортун жараксыз деп табуу боюнча райондук сотко берген арызын кайтарып алып, ишти кароо токтотулган. Бүгүн, 16-ноябрда SUPER.KG'ге Мамлекеттик каттоо кызматынын алдындагы жарандык абалдын актыларын каттоо департаменти арызды кайтарып алуунун себебин түшүндүрүп берди.

Департаменттин юристи Тынчтыкбек Жакеев документ соттон кайтарылганы менен азырынча Кулматов ID жана жалпы жарандык паспортун мыйзамсыз алганы боюнча позиция өзгөртүлбөй турганын белгиледи.

"Кулматовдун паспорту боюнча доо арызды сотто кароодо көптөгөн суроолор жаралды. Ошондуктан кайра иштеп чыгуу жана кошумчалоо максатында артка кайтарып алдык. Кайра иштеп чыккандан кийин арыз беребизби же жокпу, азырынча бул маселе чечиле элек. Бирок азырынча Кулматов ID жана жалпы жарандык паспортун мыйзамсыз алган деген позициядабыз", - деди Жакеев.

Ал кошумчалагандай, соттон кайтарып алынган документтер азырынча департаментке келип түшө элек.

Учурда Кулматов УКМКнын тергөө абагында кармалууда. Ага 2014-жылы Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айып тагылып жатат.