"ЭЛДИК КАБАРга" жооп: "Ош электр" ишканасы: "Оңдоо иштеринен улам Өзгөндүн Көлдүк, Мырзаке, Салам-Алик, Кызыл-Туу айылдарында электр жарыгы өчүрүлдү"

Ош облусунун Өзгөн районуна караштуу Көлдүк, Мырзаке, Салам-Алик, Кызыл-Туу айылдарында электр энергиясы үзгүлтүккө учурап жатканы тууралуу окурман "ЭЛДИК КАБАРга" маалымдаган эле.

"Ош электр" ишканасы электр жарыгынын өчүрүлгөнү боюнча жооп берди. Анда оңдоо иштери жүргүзүлгөнү тууралуу айтылат.

"12-ноябрь жана 15-ноябрь күнү "Улуттук электр тармактары" ААКсы 110 киловатт жогорку чыңалуудагы "Жалал-Абад-Өзгөн", "Өзгөн-Кара-Кулжа", "Маңгыт" аба чубалгыларын оңдоо иштерин жүргүзгөндүгүнө байланыштуу Салам-Алик, Мырзаке, Маңгыт, Терек, Ой-Тал көмөкчү чордондорунда электр жарыгы өчүрүлгөн. Мындан улам Өзгөн районунун Көлдүк, Мырзаке, Салам-Алик, Кызыл-Туу айылдарында, Кара-Кулжа районунун Алайкуу айылында жана Араван районунун Керме-Тоо айылында электр энергиясы саат 8:00дөн 17:00гө чейин үзгүлтүккө учураган. Келтирилген ыңгайсыздыктар үчүн "Улуттук электр тармактары" жана "Ош электр" ишканалары кечирим сурайт", - деп билдиришти аталган ишканадан.